تستحي من الناس

السلام عليكم ورحمة الله وبركاته
والصلاة والسلام على خاتم الأنبياء والمرسلين نبينا محمد وعلى آله وصحبه ومن تبعهم بإحسان إلى يوم الدين أمابعد
( طبعا أنا أناقش الحياء الزايد عن حده أما الحياء الطبيعي بالعكس محمود ومطلوب من كل الناس وأنا من أشد المشجعات للحياء الطبيعي)
أختي الحيويه << والله حلوه هالكلمه
وش تعريف الحياء عندك ؟؟؟؟؟؟
هل هو خدود حمرا وعيون دامعه وراس مدنق (مخفوض)
وعزله عن الكون وتعقيد بالتفكير وإنطواء فالتعامل
إذا كان هذا هو تعريفه عندك يابعدي تراك غلطانه بالعكس الحياء نعمه من الله يزين بها خلقه
وببدى معك نقاش ياتقنعيني ياأقنعك يانوصل لنقطه معينه ياغلاي راح أناقشك بالمواضع اللي في الغالب تستحين فيها وش هي ردة فعلك العفويه و وش المفروض تسوين فيها
وأتمنى تكونين واضحه معي بتفكيرك وصريحه مع نفسك وتقارنين ردة فعلك أنتي مع ردة الفعل اللي أطرحها عشان نوصل لحل
في البدايه
إذا كنت في مجلس مليان ناس
1/ وحده مدحتك وأثنت عليك وعلى ثقالة عقلك
طبعا ردة فعلك العفويه بما أنك حيويه كثير وجهك راح يصير ألوااااااان وتتلعثمين وتتصرفين تصرفات غريبه أحيانا تحسين نفسك مهبوله ويذوب وجهك وتجلسين طول القعده يوه وش فيني وليه وماليه يعني بالعربي تحاسبين نفسك زياده على اللزوم وتخرب القعده وتتمنين أنك ماطلعتي ولاجيتي هذا المكان وتسوين فلم وتعيدين اللقطه ستين ألف مره ببالك وتكملين الإخراج بالبيت على المخده
ردة الفعل الطبيعيه
تبتسمين (وحتى لو يشب وجهك كله أحمر من الحياء) وتقولين بأي صوت واطي عالي متقطع (أهم شيء يطلع صوت) مشكوره هذا من ذوقك إذا كانت حرمه كبر أمك اللي مدحتك وإذا كانت بنوته عاد طولي شوي بالسالفه قولي لها مشكوره هذا من ذوقك الحلو يشوف كل شيئ حلو وبس ومع التعويد كل مره بيطلع صوتك عادي وهادي وجملك بترتب <<< بس هاه مهوب في النهايه تقطين الحياء مره وحده وتصيرين رجه والناس تدعي علي هههههههههها
2/إذا وحده غسلت شراعك وسبتك قدام العالم بدون سبب أو لسبب سخيف ما يستدعي التشرشح اللي سوته فيك
ردة فعلك العفويه
وجهك بيروح فيها ومن داخلك زلازل وتصرخين من داخلك حراااااااااااااااااااااااااااام عليك ذبحتيني ويمكن تكرهينها إذا كانت الإهانه قويه وبتدمعين قدام المجلس كله بدون شعور << وطبعا هي بيطقها الفخر إنتصرت حمد لله والشكر
وراح تدور عيونك بين الخلق تدورين عضيداتك ( خواتك هلك قريباتك صديقاتك) تبين منهم يساعدنك ويصدن هالرماح اللي تصوبها هالظالمه حولك وهن متفاجأت وش بلى هذي غسلت شراعك وأنتي كاسره خاطرهن فردن عليها أو ما ردن راح تطلعين من المجلس كله لأنك تبقين تتنفسين
ردة الفعل الطبيعيه
إذا كنتي غلطانه تروحين عند أم إزعاج هذي وتقولين لها حقك علي أنا آسفه حتى ولو كنتي من داخل تنزفين من تصرفها وتطلعين شوي تفرغين دمعاتك بعيد عن الناس صدقيني ياغلاي بترد عنك الملائكه وتكسبين رضا ربك ثانيا بتكبرين في عين الناس لأن الناس ماتشوف من أخطأ بالعكس تشوف ردة الفعل وكل اللي بالمجلس تقوم عندهن الفلسفه والأحكام وكن كل وحده أكبر قاضي مايجي نصها والفزعات وأشياء الله يغنيك عنها
طيب لو كنتي أنت ماغلطتي بس هي تبقى تسوي فلم إنها مظلومه وماأعرف وشو خلاص قولي لها إذا غلطت عليك سامحيني بس أنا ماأذكر إني قد خطيت على أحد والله يسامح الجميع وبعدها إتركيها بحالها مهما سوت خليها ترد على حالها لابد وحده بتسكتها وهذا مهوب ضعف هذا قمة القوه وهي وغيرها يعرفن هذا الشيء زين وروحي بعدين بالبيت فرغي دمعاتك وبس ماله داعي تصيرين مصلحه وتعذبين نفسك إذا اللي خطت رجه ولا تحاولين تنتقمين لأن سكوتك عنها وربي أكبر إنتقام
الموضع الأخير
لو شفتي خطأ في الناس وهم يسونه بجرأه تامه ويحسبونه صح وأنتي عارفه أنه مليون بالميه خطأ
1/ لو كان المخطي إنسان عزيز على قلبك
ردة فعلك العفويه
بتسكتين وأحيانا بتجاملين وتعطين أعذار وأكبر خطأ إنك راح تأيدين والشخص اللي حولك يروح فيها بسبب راي حيوي صدر منك وإذا قعدتي مع نفسك بتسوين أفلالالالالالالالام من الندم وياليتني سويت وياليتني ماسويت وأنا كذا وهو كذا وساعات تشيلين السماعه وتسكرينها تبين توضحين الموضوع ولكن مافيه أمل تستحين تتكلمين وأحيان كثيره تخافين على هذا الشخص لا ينجرح
ردة الفعل الطبيعيه
تقولين إسمح لي أو إسمحي لي يالغاليه أنتي سألتيني وأنا بجاوبك برايي وإن شاء الله أكون أرضيت ربي وضميري وما ضريتك وقولي رايك وإذا مافيه أمل حياك زايد ماتقدرين تتكلمين قولي سألي غيري يمكن أحسن بس أبد لاتجاملين لأنه يوم الحشر بتمسك وبتقول لك أنتي السبب
2/ إذا كانت المخطيه وحده ماتعرفينها بس صادفتيها بسوق وإلا بشارع وإلا بمدرسه وإلا كليه وإلا مشغل
ردة فعلك العفويه
بيتقطع قلبك وتتمنين تنصحينها وساعه تطالعين فيها ودي وما ودي وأخاف إنها تهزئني أو تقول لي وش دخلك وتعيشين صراع لمن تروح هذي البنت ويمكن حتى بالبيت تتذكرينها وتتأثرين
ردة الفعل الطبيعيه
إذا أبد ماتقدرين تنصحينها مري بجنبها وقولي اللهم إهدي المسلمات لما تحبه وترضاه أو إكتبي ورقه صغيره فيها دعاء( ويفضل تكون بكمبيوتر <<عن السحر تراه منتشر ياربي لك الحمد على نعمة العقل والدين
أو كتيبات من المكتبات الإسلاميه) وعطيها إختك الصغيره أو أخوك الصغير يوصلها لها ويمشي مايستناها لمن تقراها وتفنن بوجهه طراقات وكذا لحد ما تتعودين وإذا كانت بمشغل وتبي تنمص أو تسوي مساج مغربي للجسم كله << يالله لك الحمد تخلف عصور طرزان
المهم قربي منها وقولي لها الحكم وقولي لها والله أعزّك وماتهونين حنا بالدين خوات وأحيانا بعضهن تغسل شراعك ليه تنصحينها فإذا كانت كذا من الأفضل تسوينها (إياك أعني وإسمعي ياجاره) يعني تقولين لأختك أو قريبتك اللي معك الله يهدي هالبنات مايجوز سمعت شيخ0000 ويعني تطقينها سالفه
في الأخير بقولك رأي العلامه إبن باز رحمه الله في هذا الموضوع
( والحياء من الإيمان وهو خلق كريم يقوم بالقلب ويمنع عن سفاسف الأخلاق وسيئ الأعمال ويدعو إلى مكارم الأخلاق ومحاسن الأعمال.
وما يدعو إلى الجبن والضعف عن القيام بأمر الله والغيره لدينه والنصح لعباده فإنه ليس بحياء ولكنه خور وضعف لايليق بالمؤمن التخلق به)
خدمة إبن باز 88552
في النهايه ياغلاي أتمنى كل وحده حيويه تكتب لنا عن المواقف اللي تحطمت فيها وتشاركنا همها
إن أصبت فمن الله وإن أخطأت فمن نفسي والشيطان
أختكن في الله
وجااااااااااااين

مشكور على الموضو الجميل الروعه

» كيف تجعل الناس يحبونك
» ان رأيت الناس يعجبون بك فأعلم......
» عشرون مهارة تجعلك محبوبا بين الناس إن شاء الله